Sentyabrın 14-də Bakıda Azərbaycan, Gürcüstan və Rumıniya arasında "AGRİ" (Azerbaijan-Georgia-Romania İnterconnector) layihəsinin dəstəklənməsi üzrə zirvə görüşü keçiriləcəkdir.
Sənaye və Energetika Nazirliyinin mətbuat xidmətindən bildirmişlər ki, sammitdə Bakı bəyannaməsinin imzalanması gözlənilir. Birgə bəyannamənin razılaşdırılması məqsədi ilə sentyabrın 6-da ekspertlərin, ayın 13-də isə üç dövlətin müvafiq nazirliklərinin rəhbərlərinin görüşləri keçiriləcəkdir.
Rumıniya, Azərbaycan və Gürcüstan arasında "AGRİ" layihəsinin reallaşması ilə bağlı anlaşma memorandumu aprelin 13-də Buxarestdə imzalanmışdır. "AGRİ" layihəsi çərçivəsində gələcəkdə Azərbaycan təbii qazının Qara dəniz sahillərinə nəql olunması, burada xüsusi terminalda sıxılması, tankerlə Rumıniyanın Konstansa limanındakı terminala çatdırılması, daha sonra isə yenidən bu ölkənin ərazisində mövcud qaz infrastrukturu şəbəkəsi ilə Rumıniya və digər Avropa ölkələrinin tələbatlarının ödənilməsinə yönəldilməsi planlaşdırılır. Gələcəkdə Azərbaycan qazını Avropa İttifaqına üzv ölkələrə ixrac etmək üçün Konstansadan Bolqarıstan və Macarıstana iki ayrı boru kəməri çəkilməsi də nəzərdə tutulur.
AzərTAc{nl}