Bu gün ARDNŞ rəhbərliyi ilə Qazaxıstanın neft və qaz nazirinin müavini Maqzum Mirzaqaliyev arasında görüş keçirilmişdir.

Trend Dövlət Neft Şirkətinin rəsmi saytına istinadən məlumat verir ki, ARDNŞ-in emal üzrə vitse-prezidenti David Məmmədov Azərbaycanın neft sənayesinin tarixi, eləcə də son illərdə ölkədə həyata keçirilən qlobal və regional əhəmiyyət daşıyan layihələr haqqında ətraflı məlumat verərək, bu layihələr çərçivəsində əldə olunan nailiyyətlərdən, xüsusilə Qazaxıstanın “Kazmunayqaz” şirkəti ilə əlaqələrdən söz açmışdır.

SOCAR-ın yeni layihələri ilə qonaqları tanış edən ARDNŞ-in vitse-prezidenti Azərbaycanın enerji sektorunda əldə olunmuş müvəffəqiyyətlər, infrastrukturun yenilənməsi prosesi haqqında qonaqlara ətraflı məlumat vermişdir.

Qazaxıstanın neft və qaz nazirinin müavini M.Mirzaqaliyev isə Azərbaycanın iqtisadi inkişaf tempi baxımından mühüm nailiyyətlər qazandığını vurğulayaraq, ölkəmizdə həyata keçirilən neft-qaz layihələrinin regional və qlobal əhəmiyyətini yüksək qiymətləndirmişdir.

Nazir müavini ölkəsində həyata keçirilən neft-qaz layihələrinin böyük perspektivə malik olduğunu diqqətə çatdırmış, “TengizChevroil” şirkətinin hasil etdiyi neftin Bakı-Tbilisi-Ceyhan boru kəməri ilə nəql edilməsi arzusunda olduqlarını bildirmişdir. O, həmçinin son illərdə Azərbaycanda gerçəkləşdirilən qazlaşdırma siyasətinin Qazaxıstanda böyük maraq doğurduğunu və bu təcrübəni öyrənməkdə maraqlı olduqlarını qeyd etmişdir.