ARDNŞ-in Neft-Qaz Emalı və Neft-Kimya Kompleksinin (NQNK) inşası ilə əlaqədar olaraq kompleks və onun ətrafındakı ərazilərdə infrastrukturun (dəmir yolu, avtomobil yolu, xammal və məhsullar üçün boru kəmərləri və s.) qurulması üçün topoqrafik tədqiqat işləri aparılmışdır.

Trend ARDNŞ-nin saytına istinadən xəbər verir ki, müvafiq işlər bP və Total şirkətləri ilə birlikdə “Fugro” şirkəti tərəfindən müasir texnologiyalardan istifadə edilərək LİDAR (lazer texnologiyasına əsaslanan şüalarla yerin quruluşunun müəyyən edilməsi) aeroçəkilişi vasitəsilə aparılır.

Bu texnologiyanın üstünlüyü ondan ibarətdir ki, qısa müddət ərzində böyük sahəni əhatə edən ərazi səthinin morfologiyasının (yüksəkliklər, onların hündürlükləri və s.), o cümlədən ərazidə mövcud olan müxtəlif növ çökəkliklərin (yarğanlar, çay yataqları və s.) 3D modelinin qurulması və yer səthi barədə layihələndirmə işləri üçün lazım olan digər keyfiyyətli məlumatların qısa müddətdə əldə edilməsi mümkündür.

Hazırda alınmış məlumatlar layihəçi şirkət olan “Socar Foster-Viler” Mühəndislik Xidmətləri MMC-də emal edilir və təsdiqləndikdən sonra layihələndirmənin növbəti mərhələlərində istifadə olunacaqdır.