Bu ilin yanvar-sentyabr ayları ərzində “Şahdəniz” yatağından Azərbaycan, Gürcüstan və Türkiyə bazarları üçün qaz hasilatı davam etdirilmişdir. “Şahdəniz-1” mərhələsində hasil olunan qaz Azərbaycana, GOGC (Gürcüstan) şirkətinə, BOTAŞ-a (Türkiyə) və lBTC Co.” şirkətinə satılmışdır.

“BP-Azerbaijan” şirkətindən “APA-Economics”ə verilən məlumata görə, hesabat dövründə yataqdan 7,3 milyard kubmetr qaz və 1,85 milyon ton və ya təqribən 14,6 milyon barel kondensat və ya gündəlik təxminən 26,6 milyon kubmetr qaz və 53,7 min barel kondensat hasil edilmişdir.

Qeyd edək ki, 2006-cı ilin sonunda “Şahdəniz”də hasilat başlanandan 2013-cü il oktyabrın 1-dək yataqdan bazarlara təqribən 44,8 milyard kubmetr qaz və təqribən 12 milyon ton və ya 94,6 milyon barel kondensat ixrac edilmişdir.

Bu ilin ilk 9 ayında “Şahdəniz” üzrə fəaliyyətə 143 milyon ABŞ dolları həcmində əməliyyat xərcləri və 1 364 milyon dollar əsaslı xərc çəkilib. Bütün il üçün bu rəqəmlərin müvafiq olaraq 222 milyon dollar və 2 191 milyon dollar olacağı gözlənilir.

Qeyd edək ki, “Şahdəniz” layihəsində BP (operator - 25,5 faiz, lStatoil” (25,5 faiz), ARDNŞ (10 faiz), “LUKoil” (10 faiz), NICO (10 faiz), “Total” (10 faiz) və TPAO (9 faiz) şirkətləri iştirak edirlər.