Azərbaycan Respublikası Dövlət Neft Fondundan (DNF) bildirmişlər ki, 2010-cu ilin yanvar-iyun aylarında qurumun büdcə gəlirləri 6 milyard 101,2 milyon manat, büdcə xərcləri isə 2 milyard 630,2 milyon manat təşkil etmişdir.
Bu müddətdə DNF-in neft və qaz sazişlərinin həyata keçirilməsi ilə bağlı gəlirləri 6 milyard 89,3 milyon manat, o cümlədən mənfəət neftinin və qazın satışından 6 milyard 0,1 milyon manat, Heydər Əliyev adına Bakı-Tbilisi-Ceyhan əsas ixrac boru kəməri layihəsi üzrə dividendlərdən 83,2 milyon manat, tranzit gəlirləri 4,3 milyon manat, xarici sərmayəçilər tərəfindən təhvil verilmiş aktivlərdən 0,9 milyon manat, akrhesabı ödənişlər 0,8 milyon manat təşkil etmişdir.
Ötən 6 ayda fondun vəsaitlərinin idarə olunmasından əldə olunan gəlir 11,9 milyon manata bərabər olmuşdur.
Hesabat dövründə DNF-in 2010-cu il büdcəsinin icrası çərçivəsində 2 milyard 455 milyon manat vəsait dövlət büdcəsinə transfer edilmişdir. Qaçqın və məcburi köçkün ailələrinin məskunlaşdırılması və sosial-məişət vəziyyətinin yaxşılaşdırılması üzrə tədbirlərin həyata keçirilməsinə 34 milyon manat, Samur-Abşeron suvarma sisteminin yenidən qurulması və Oğuz-Qəbələ zonasından Bakı şəhərinə su kəmərinin çəkilişi layihələrinin maliyyələşdirilməsi məqsədi ilə müvafiq olaraq 74,8 milyon manat və 53 milyon manat vəsait ayrılmışdır. "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı"nın maliyyələşdirilməsinə fonddan 2,8 milyon manat vəsait ayrılmış, "Bakı-Tbilisi-Qars yeni dəmir yolu" layihəsinin maliyyələşdirilməsinə isə 1,5 milyon manat yönəldilmişdir.
2010-cu ilin ilk yarısında DNF-in idarə edilməsi ilə bağlı xərcləri 9,1 milyon manat olmuşdur.
Valyuta məzənnələrinin dəyişməsindən yaranan fərq ilə bağlı fondun büdcədənkənar xərcləri 869,1 milyon manat təşkil etmişdir.
2010-cu il iyulun 1-nə DNF-in aktivləri ilin əvvəlinə (14 milyard 900,4 milyon ABŞ dolları) nisbətən 21,6 faiz artaraq 18 milyard 122,3 milyon ABŞ dollarına bərabər olmuşdur.{nl}