Azərbaycanda səfərdə olan Böyük Britaniya Baş nazirinin ticarət üzrə elçisi, Lordlar Palatasının üzvü Lord Risbinin başçılıq etdiyi nümayəndə heyəti sentyabrın 26-də Milli Məclisin sədri Oqtay Əsədovla görüşmüşdür.

Görüşdə Oqtay Əsədov Azərbaycan və Böyük Britaniya münasibətlərindən danışmış, əlaqələrin möhkəmləndirilməsində qarşılıqlı səfərlərin, görüşlərin əhəmiyyətini qeyd etmişdir. Bildirilmişdir ki, ölkələrimiz arasında siyasi münasibətlər möhkəmləndirilir, iqtisadi əməkdaşlıq inkişaf edir, ticarət dövriyyəsi ildən-ilə artır. Ötən il Azərbaycanla Böyük Britaniya arasında ticarət əlaqələrinin 800 milyon dollardan yuxarı olduğunu deyən Milli Məclisin sədri vurğulamışdır ki, cari ilin altı ayında isə bu göstərici 700 milyon dollara yaxın olmuşdur. Bu isə ölkələrimiz arasında mövcud iqtisadi əlaqələrimizin inkişaf dinamikasının göstəricisidir.

Ölkələrimizin parlamentləri arasında da yaxşı əməkdaşlığın mövcud olduğunu deyən Oqtay Əsədov hər iki ölkənin qanunverici orqanlarında fəaliyyət göstərən dostluq qruplarının münasibətlərin inkişafında mühüm rolu olduğunu diqqətə çatdırmışdır.

Milli Məclisin sədri Avropa ölkələri ilə qarşılıqlı əməkdaşlığın gücləndirilməsinin Azərbaycanın xarici siyasətinin əsas istiqamətlərindən olduğunu diqqətə çatdırmış, ölkəmizin bu qitənin enerji təhlükəsizliyinin təminatındakı mühüm rolunu qeyd etmişdir.

Ermənistan-Azərbaycan, Dağlıq Qarabağ münaqişəsindən danışan Oqtay Əsədov problemin nəinki region, bütövlükdə Avropanın təhlükəsizliyinə ciddi maneə yaratdığını vurğulamışdır.

Lord Risbi də iki ölkə arasında yüksələn xətt üzrə inkişaf edən münasibətlərindən, Böyük Britaniya şirkətlərinin Azərbaycandakı fəaliyyətindən məmnunluqla danışmışdır. Bildirmişdir ki, Azərbaycan Avropanın enerji təhlükəsizliyinin təminatında mühüm rol oynayır və bu, yüksək qiymətləndirilir.

AzərTAc