Sentyabrın 20-də Bakıda “bp Azərbaycan” şirkətinin “bp Xəzər Mərkəzi” adlanan yeni ofisi açılmışdır.

AzərTAc xəbər verir ki, yeni ofis Neftçilər prospektindəki “Port Baku” kompleksində yerləşir.

Yeni ofisin açılış mərasimində bp-nin Azərbaycan, Gürcüstan və Türkiyə üzrə regional prezidenti Qordon Birrell və Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayev, müxtəlif dövlət qurumları və tərəfdaş təşkilatların nümayəndələri iştirak etmişlər.

ARDNŞ-in prezidenti  Rövnəq Abdullayev Azərbaycan ilə bp şirkəti arasında əməkdaşlıq əlaqələrindən danışmış, yeni ofisin açılması münasibətilə şirkətin əməkdaşlarını təbrik etmiş, işlərində uğurlar arzulamışdır. Bildirilmişdir ki, yeni ofisin açılması Azərbaycanın sürətli inkişafının göstəricisidir.

bp-nin regional prezidenti Qordon Birrell bildirmişdir ki, yeni ofis ən qabaqcıl texnologiyalar, o cümlədən bp-nin bütün uzaq məsafədə yerləşən dəniz və qurudakı obyektləri ilə birbaşa əlaqə yaratmağa imkan verən Qabaqcıl Birgə İş Mühiti (ACE) texnologiyası, habelə təhlükəsiz çap etmə qurğuları, iclas otaqlarının elektron şəkildə sifariş edilməsi və s. təchiz edilmişdir. Yeni ofis işçilərin iclaslar və digər işgüzar məqsədlər üçün şəhərin müxtəlif yerlərinə səfər etməsi zərurətini aradan qaldıracaqdır. İclas otaqlarımızda istifadə edilən müasir “TelePresence” texnologiyası imkan verəcəkdir ki, dünyanın müxtəlif yerləri ilə birləşmiş şəbəkə üzərindən əlaqə yaradaraq “şəxsən” görüşmə imkanı əldə edək. Kollektivimiz bu sağlam, texnoloji cəhətdən əlverişli və gözəl iş mühitindən faydalanacaqdır. Yeni ofisdə beynəlxalq miqyasda qəbul edilmiş təcrübəyə uyğun olaraq məhdud əmək qabiliyyətli insanlar üçün lazımi şərait yaradılmışdır.

Vurğulanmışdır ki, “bp Xəzər Mərkəzi” 16 mərtəbəli binanın 5-14-cü mərtəbələrində yerləşir, 2 min 100 iş masasından və 135 iclas otağından ibarətdir. Binanın tikintisinə 2009-cu ilin sonlarında başlanmışdır.

Tədbirdə “Qərbi Çıraq” platformasının tikintisi və onun dayaq modullarının dənizdə quraşdırılmasından bəhs edən videoçarx nümayiş etdirilmişdir.

Daha sonra yeni ofisdə yaradılan şəraitlə tanışlıq olmuşdur.