Sentyabrın 7-də iqtisadi inkişaf naziri Şahin Mustafayev Xızı şəhərində vətəndaşları qəbul etmişdir. AzərTAc xəbər verir ki, Heydər Əliyev Mərkəzində təşkil edilmiş qəbulda nazir Xızı ilə yanaşı, Sumqayıt, Abşeron, Şuşa, Qubadlı və Zəngilandan olan vətəndaşların müraciət və təkliflərini dinləmişdir.

Qəbula gələn vətəndaşlar əsasən sahibkarlıq fəaliyyəti, güzəştli kreditlərin verilməsi, kiçik istehsal və xidmət sahələrinin yaradılması, kənd yollarının tikintisi və işə qəbulla bağlı müraciət etmişlər.

Qəbulda olan sahibkarlarla quşçuluq, heyvandarlıq, toxumçuluq təsərrüfatının genişləndirilməsi, istixanaların yaradılması, yeni texnologiyalara əsaslanan mebel istehsalı, turizm-sanatoriya sahələri üzrə layihələr müzakirə edilmiş və investisiya layihələrinin maliyyələşdirilməsi barədə müvafiq göstərişlər verilmişdir.

İqtisadi İnkişaf Nazirliyinin aidiyyəti struktur bölmələrinin rəhbərlərinin də iştirak etdikləri qəbulda bir sıra müraciətlər yerindəcə həll edilmiş, digər müraciətlərin isə hərtərəfli öyrənilməsi və qanunvericiliyə uyğun həlli üçün tapşırıqlar verilmişdir.

Qəbul zamanı vətəndaşların İqtisadi İnkişaf Nazirliyinin səlahiyyətlərinə aid olmayan məsələlərlə bağlı müraciətləri isə aidiyyəti qurumlara çatdırılmaq üçün qeydiyyata alınmışdır.

Qəbul günü birbaşa müraciət edən vətəndaşlar da nazir Şahin Mustafayev tərəfindən qəbul edilmiş, hər bir vətəndaş dinlənilmiş, müraciətlərin operativ həlli üçün qanunvericiliyə müvafiq tədbirlər görülmüşdür.

İqtisadi inkişaf nazirinin Xızıda vətəndaşları qəbul edəcəyi barədə ictimaiyyət əvvəlcədən məlumatlandırılmış, qəbula dair kütləvi informasiya vasitələrində müvafiq elanlar verilmiş, nazirliyin rəsmi internet və “Facebook” səhifələrində vətəndaşların müraciətləri qeydiyyata alınmışdır.