Ümumdünya İqtisadi Forumunun hesabatında Azərbaycanın informasiya-kommunikasiya texnologiyaları (İKT) üzrə göstəriciləri əhəmiyyətli dərəcədə yaxşılaşmışdır.

Xatırladaq ki, Qlobal Rəqabətqabiliyyətlilik İndeksi üzrə Azərbaycan dünyanın 148 ölkəsi arasında 39-cu yeri tutmuşdur. Keçən ilin reytinqi ilə müqayisədə Azərbaycan (144 ölkə arasında) 46-cı yerdəki mövqeyindən 7 pillə irəliləyərək MDB məkanında öz liderliyini yenə də qoruyub saxlamışdır.

Rabitə və İnformasiya Nazirliyinin məlumatına görə, ölkədə mobil genişzolaqlı internet istifadəçilərinin sayı 54,8 faiz artmışdır. Hazırda Azərbaycanda hər 100 nəfərə 33,3 genişzolaqlı mobil internet istifadəçisi düşür və bu göstərici üzrə ölkəmiz 148 ölkə arasında 50-ci yeri tutur.

Ölkədə hər internet istifadəçisinin payına 40,1 kbit/s internet trafiki düşür ki, bu da Azərbaycanın müvafiq reytinqdə 61-ci yerdən 45-ci yerə irəliləməsinə səbəb olmuşdur.

Fərdi internet istifadəçilərinin sayına görə ölkəmiz ötən illə müqayisədə mövqeyini 8,4 faiz artıma nail olaraq 59-cu yerdə qərarlaşmışdır.

Azərbaycanda əhalinin hər 100 nəfərinə 107,5 mobil telefon düşür və bu göstərici üzrə ölkəmiz 78-ci yeri tutur.

Stasionar rabitə sahəsində Azərbaycanın göstəriciləri ötən illə müqayisədə 1,6 faiz yüksəlmişdir. Bu göstərici üzrə ölkəmiz 67-ci mövqedədir. Hazırda hər 100 nəfərdən 18,4 faiz stasionar rabitə istifadəçisidir.

Genişzolaqlı internet xidmətləri istifadəçilərinin sayına görə isə Azərbaycan 47-ci yerdə qərarlaşmışdır, bu da ötən ilin müvafiq göstəricisindən 7 pillə yüksəkdir.

Samirə ƏLİYEVA,

“Xalq qəzeti”