Azərbaycan Respublikasının Dövlət Neft Şirkəti (ARDNŞ) “Urals” markalı neftin Bakı-Novorossiysk neft kəməri vasitəsilə geriyə nəqli ilə bağlı Rusiyanın “Rosneft” şirkəti ilə danışıqlar aparır.

AzərTAc xəbər verir ki, bu sözləri ARDNŞ-in prezidenti Rövnəq Abdullayev jurnalistlərə müsahibəsində söyləmişdir.

ARDNŞ prezidenti bildirmişdir ki, “Rosneft” şirkəti ilə aparılan danışıqlara əsasən, ilkin mərhələdə Bakı-Novorossiysk kəməri ilə 5 milyon ton həcmində Rusiya nefti Azərbaycana idxal olunacaqdır. Həmin neftin bir hissəsi Heydər Əliyev adına Bakı neft emalı zavodunda emal olunacaq, qalanı isə Bakı-Tbilisi-Ceyhan neft kəməri ilə nəql  ediləcək Ceyhan limanından Avropa bazarına çıxarılacaqdır. Bütün bunlarla bağlı dəqiq hesablamalar aparılır və ilin sonunadək “Rosneft” şirkəti ilə hər hansı razılıq əldə olunacağı planlaşdırılır.

R.Abdullayev qeyd etmişdir ki, ARDNŞ neft-qaz sənayesində dünyanın bütün şirkətləri ilə tərəfdaşlıq edir. “Rosneft” şirkəti də ildə orta hesabla  210 milyon ton neft istehsal edən tanınmış şirkətdir. Bu gün iki şirkət arasında neftin mənfəətli satışına dair də birgə tərəfdaşlıq işləri aparılır.