Azərbaycan Respublikası Dövlət Neft Şirkətinin (ARDNŞ) “Bulla-dəniz” yatağındakı 90 nömrəli axtarış quyusunda baş vermiş qəzanın aradan qaldırılması üçün ARDNŞ-nin prezidenti Rövnəq Abdullayevin əmri ilə komissiya yaradılmışdır.

AzərTAc xəbər verir ki, ARDNŞ-nin vitse-prezidenti Rəhman Qurbanovun sədrlik etdiyi və tərkibinə bu şirkətin, Fövqəladə Hallar Nazirliyinin fontana qarşı mübarizə və yanğından mühafizə üzrə təcrübəli mütəxəssislərinin daxil edildiyi komissiyanin ilk iclası keçirilmişdir.

“bp-Azərbaycan” şirkətinin kömək üçün ARDNŞ-yə müraciəti nəzərə alınaraq, iclasa bu şirkətin nümayəndələri də müşavirəyə dəvət olunmuşlar.

İclasda qəza baş vermiş obyektdə vəziyyət haqqında məlumatlar və bu situasiyadan çıxış yolları haqqında təkliflər, o cümlədən “bp-Azərbaycan” şirkətinin təklifləri dinlənilmişdir.

Müzakirələrdən sonra iştirakçıların yekdil rəyinə əsasən, yanğının söndürülməsi işinin ARDNŞ-nin Təhlükəsizlik İdarəsinin fontana qarşı dağmədənxilasetmə hərbiləşdirilmiş hissəsinin və Fövqəladə Hallar Nazirliyinin müvafiq strukturlarının birgə səyləri əsasında həyata keçirilməsi qərara alınmışdır.

İclasda qəzanın aradan qaldırılması üzrə ilkin proqram hazırlanmış, fontanın təcrid edilməsi üçün görüləcək işlər müzakirə olunmuş, müvafiq strukturlara konkret tapşırıqlar verilmişdir. Artıq həmin tapşırıqlar əsasında quyuda təcridetmə üzrə hazırlıq işlərinə başlanılmışdır.