Azərbaycan Respublikası Dövlət Statistika Komitəsindən aldığımız məlumata görə, 2013-cü il iyulun 1-i tarixinə ölkə iqtisadiyyatında muzdla çalışan işçilərin sayı 1490,3 min nəfər olmuşdur.

Bu işçilərdən 891,8 min nəfəri iqtisadiyyatın dövlət bölməsində, 598,5 min nəfəri isə qeyri-dövlət bölməsində (özəl sektorda) fəaliyyət göstərmişdir.  Muzdla işləyənlərin 22,5 faizi təhsildə, 18,6 faizi ticarət və nəqliyyat vasitələrinin təmiri sahəsində, 12,7 faizi sənayedə çalışanlar olmuşdur. Bundan başqa, əhaliyə səhiyyə və sosial xidmətlərin göstərilməsi sahəsində çalışanların sayı 8,8 faiz, tikinti sahəsində işləyənlərin sayı 7,3 faiz, nəqliyyat və anbar təsərrüfatında fəaliyyət göstərənlərin sayı 4,9 faiz təşkil etmişdir. Məlumatda həmçinin bildirilir ki, muzdla işləyənlərin 3,5 faizi peşə, elmi və texniki fəaliyyət sahəsində, 2,9 faizi kənd təsərrüfatı, meşə təsərrüfatı və balıqçılıq sahəsində, 1,8 faizi informasiya və rabitə sahəsində və 17 faizi isə iqtisadiyyatın digər sahələrində məşğul olmuşlar.  2013-cü ilin yanvar-iyun aylarında ölkə iqtisadiyyatında muzdla çalışan işçilərin orta aylıq nominal əmək haqqı artaraq 410,8 manat təşkil etmişdir ki, bu da keçən ilin müvafiq dövrünə nisbətən 6,8 faiz çoxdur. Digər fəaliyyət növləri ilə müqayisədə mədənçıxarma sənayesində, maliyyə və sığorta fəaliyyətində, informasiya və rabitədə, peşə, elmi və texniki fəaliyyət sahəsində, tikintidə, inzibati və yardımçı xidmətlərin göstərilməsi sahəsində orta aylıq nominal əmək haqqı ötən ilin müvafiq dövrü ilə müqayisədə daha yüksək olmuşdur.

Z. BƏŞİRQIZI, “Xalq qəzeti”