Dünən “PAŞA Həyat Sığorta” ASC-də cari ilin birinci yarısının yekunlarına həsr olunmuş mətbuat konfransı keçirildi.Tədbiri şirkətin ictimaiyyətlə əlaqələr xidmətinin baş mütəxəssisi Elnur Hüseynquliyev açaraq bildirdi ki, cari ilin yanvar-iyun ayları ərzində Azərbaycanın sığorta bazarında ümumilikdə 198,021 milyon manat sığorta haqqı toplanmış, 58,098 milyon manat ödəniş həyat keçirilmişdir.

“PAŞA Həyat Sığorta” həmin müddətdə 16 milyon manatdan artıq sığorta haqqı toplamışdır ki, bu da ötən ilin müvafiq dövrü ilə müqayisədə 7,420 milyon manat, yəni 84,4 faiz çoxdur. Şirkət 2013-cü ilin 6 ayında 0,445 milyon manat sığorta ödənişi həyata keçirmiş, 2012-ci ilin müvafiq dövründən 253,17 faiz çoxdur.

Qeyd olundu ki, hazırda Azərbaycanda fəaliyyət göstərən sığorta şirkətlərinin 1 iyul 2013-cü il tarixinə ödənilmiş nizamnamə kapitalının həcminə görə, şirkət ilk üçlükdə qərarlaşıb. Belə ki, “PAŞA Həyat Sığorta” ASC cari ilin birinci yarısında nizamnamə kapitalını  10,150 milyon manat artıraraq 25,200 milyon manata çatdırmışdır. Sığorta portfelinin 52,24 faizi könüllü, 47,76 faizini isə icbari  sığorta təşkil edir. Azərbaycanda həyat sığortası ilə üç şirkət ixtisaslaşıb. Onların topladığı ümumi sığorta haqları 36,558 milyon manat təşkil etmiş, bunun 44,22 faizi “PAŞA Həyat Sığorta”nın, 40 faizi “Atəşgah Həyat” sığorta Şirkətinin, 15,78 faizi isə “Qala Həyat” Sığorta Şirkətinin payına düşür.

Sonra şirkətin Risklərin idarəedilməsi şöbəsinin müdiri Pərviz Quliyev jurnalistləri maraqlandıran suallara cavab verdi, şirkətin inkişaf perspektivlərindən danışdı.

 22 İyul Milli Mətbuat Günü münasibətilə “PAŞA Həyat” Sığorta Şirkəti ilə səmərəli əməkdaşlıq etdiklərinə görə bir qrup jurnalistə mükafatlar təqdim edildi.

Qabil YUSİFOĞLU,

 “Xalq qəzet”