Azərbaycan Respublikasının Prezidenti cənab İlham Əliyevin tapşırıq və tövsiyələrinə uyğun olaraq, mərkəzi icra hakimiyyəti orqanlarının rəhbərləri bölgələrdə vətəndaşları qəbul edərək, onların qaldırdıqları problemlərin həllinə köməklik göstərirlər.

Növbəti belə qəbul Şəki şəhərində vergilər naziri Fazil Məmmədov tərəfindən keçirilmişdir. Şəki, Mingəçevir şəhərləri, Zaqatala, Balakən və Qax rayonlarından olan 70 nəfərədək vətəndaş vergi inzibatçılığı, vergi borcları, POS-terminalların quraşdırılması, sahibkarlığın inkişafına ciddi təkan verən güzəştli kreditlərin həcminin artırılması, təhsil sahəsində əlavə dəyər vergisinin ləğvinə baxmayaraq, bunun təhsil haqlarında əksini tapmaması və onları narahat edən digər məsələlərlə bağlı vergilər nazirinə müraciət etmişlər.

Bundan başqa, bir neçə vətəndaş müəllimlərin əmək haqlarının artırılması və onlardan tutulan gəlir vergisinin məbləğinə yenidən baxılmasını xahiş etmişdir. Öz növbəsində vergilər naziri Fazil Məmmədov həmin məsələnin əvvəlki görüşlərdə də qaldırıldığını diqqətə çatdırmış və artıq bu haqda Azərbaycan Respublikasının Prezidenti cənab İlham Əliyevə məruzə etdiyini bildirmişdir. Nazir dövlət başçısının bununla əlaqədar müvafiq tapşırıqlar verdiyini qeyd etmişdir.

Qaldırılan problemlərin əksəriyyəti yerindəcə həll olunmuş, digər məsələlərin araşdırılması və müvafiq tədbirlər görülməsi barədə tapşırıqlar verilmişdir.

Qəbula gələn vətəndaşlar onlar üçün yaradılmış bu imkandan razı qaldıqlarını bildirmişlər.

Vaqif BAYRAMOV,

“Xalq qəzeti”