Amerikanın nüfuzlu “Wall Street Journal” nəşri iyunun 28-də Azərbaycanın ABŞ-dakı səfirliyinin Transadriatik qaz kəməri layihəsi haqqında bəyanatını dərc etmişdir. Bəyanatda “Şahdəniz” konsorsiumunun Azərbaycanda hasil edilən təbii qazın Avropaya nəql edilməsi üçün Transadriatik qaz kəməri marşrutunun seçilməsi qərarı alqışlanır. Qeyd edilir ki, bu qərar Avropaya qaz idxalının şaxələndirilməsi üçün mühüm məqam olmuşdur.

Bəyanatda deyilir: “Transadriatik qaz kəməri marşrutu seçiləndən sonra ümid edirik ki,  “Cənub dəhlizi” layihəsinin sonrakı mərhələləri də tezliklə həyata keçiriləcəkdir. Gələcəkdə Azərbaycanda qaz istehsalı xeyli artacaq və biz gözləyirik ki, Transadriatik qaz kəməri Avropa bazarının və enerji təhlükəsizliyinin şaxələndirilməsində mühüm rol oynayacaqdır”.

Azərbaycan Respublikası Dövlət Neft Şirkətinin (ARDNŞ) rəhbəri Rövnəq Abdullayev “Şahdəniz” konsorsiumunun Avropa boru kəmərləri şaxələri layihələrindən Cənub-Şərqi Avropa ölkələrinə qaz nəqlinin daha da artırılması planlarını dəstəkləmişdir. R.Abdullayev demişdir: “Şahdəniz layihəsindən əlavə biz əminik ki, Azərbaycan qazının ixracı xeyli artacaqdır, çünki “Azəri-Çıraq-Günəşli" yatağının dərin sulu hissəsi, “Abşeron”, “Ümid”, “Şəfəq-Asiman” yataqlarında da iş gedir. Ona görə də güman edirik ki, bu kəmər həmin yataqlardan hasil edilən qaz üçün təbii bazar kimi Avstriya istiqamətində davam etdiriləcəkdir.

Yusif BABANLI,

AzərTAc

Vaşinqton