BMT-nin Ticarət və İnkişaf üzrə Konfransı ilə Azərbaycan Diplomatik Akademiyasının Bakıda keçirilən 19-cu regional kursu iyulun 20-də öz işini davam etdirmişdir.
Rusiya, Qazaxıstan, Ukrayna və digər ölkələrdən 20-dən çox nümayəndənin iştirak etdiyi tədbirdə BMT-nin Ticarət və İnkişaf üzrə Konfransının Baş katibi Supaçai Panitçpakti dünyanı bürüyən iqtisadi böhrandan və ölkələrin bu problemlə mübarizədə gördüyü tədbirlərdən danışmışdır.
Statistik rəqəmlərə istinadla iqtisadi böhranının zəiflədiyini qeyd edən baş katib vurğulamışdır ki, inkişaf üçün əməkdaşlıq vacibdir. Region dövlətlərinin qarşılıqlı inteqrasiyası bu ölkələrin bazar iqtisadiyyatının, infrastrukturunun daha yaxşı inkişaf etməsi deməkdir. Ölkəmizə gəlincə, BMT rəsmisi qeyd etmişdir ki, regionun inkişafında Azərbaycanın xüsusi rolu vardır.
S.Panitçpakti demişdir: "İki il bundan əvvəl Azərbaycanda olmuşam. Azərbaycan çox inkişaf etmişdir. Mən yoxsulluğun səviyyəsinin aşağı düşməsinin, insan kapitalının artmasının, eləcə də təhsilin səviyyəsinin yüksəldiyinin şahidi oldum. Azərbaycan təkcə özü üçün deyil, bütün region üçün böyük qüvvəyə çevrilmişdir".
Regional kurs avqustun 5-də başa çatacaqdır.
AzərTAc{nl}