Azərbaycan Mərkəzi Bankının təşkilatçılığı ilə Azərbaycan Banklar Assosiasiyasında Beynəlxalq Əmanət Günü keçirilmişdir.

Mərkəzi Bankın mətbuat xidmətindən AzərTAc-a bildirmişlər ki, qurumun sədr müavini Xəqani Abdullayev bu günün tarixi barədə danışmışdır. Bildirilmişdir ki, Azərbaycanda bu gün ilk dəfə 2012-ci ildə Mərkəzi Bankın təşəbbüsü ilə Əmanətlərin Sığortalanması Fondu, Almaniyanın Əmanət Kassalarının Beynəlxalq İnkişaf Fondu ilə birgə həyata keçirilmişdir. Bu il isə tədbirə ölkənin bütün kommersiya bankları, həmçinin Azərbaycan Mikromaliyyə Assosiasiyası dəvət olunmuşdur.

Daha sonra Almaniya Əmanət Kassalarının Beynəlxalq İnkişaf Fondunun nümayəndəsi Henninq Zeeman beynəlxalq əmanət günü ilə bağlı bu il nəzərdə tutulan tədbirlər, tələb olunan büdcə və koordinasiya məsələlərinə dair iştirakçılara ətraflı məlumat vermişdir.

Beynəlxalq Əmanət Günü  ilk dəfə 1924-cü ilin oktyabr ayında İtaliyanın Milan şəhərində, 29 ölkənin nümayəndələrinin Beynəlxalq Konqresində keçirilmişdir. Hazırda bu tədbir bütün qabaqcıl ölkələrdə, o cümlədən Azərbaycanda da qeyd edilir.

Tədbirlər çərçivəsində indiyədək Bakıda, həmçinin regionlarda 28 məktəbə səfərlər edilmiş, müxtəlif müsabiqələr keçirilmişdir. 26 bank filialı məktəblilər üçün açıq qapı günləri keçirmiş, onlara bank və iqtisadiyyat, depozit və kredit barədə ətraflı məlumatlar verilmişdir.