Azərbaycan Mərkəzi Bankının (AMB) “Mərkəzi Bank və iqtisadiyyat” adlı rüblük elektron jurnalının nəşrinə başlanılmışdır.

Bununla bağlı iyunun 7-də Azərbaycan Mərkəzi Bankında mətbuat konfransı keçirilmişdir.

Mərkəzi Bankın sədr müavini Xəqani Abdullayev jurnal haqqında ətraflı məlumat vermişdir. Bildirilmişdir ki, jurnalın nəşrinin məqsədi geniş oxucu kütləsini və professional auditoriyanı müasir ekonomikslə daha dərindən tanış etmək, iqtisadi nəzəriyyə və praktika, empirik iqtisadi tədqiqatların metodoloji məsələlərini, ölkə iqtisadiyyatının inkişafı ilə bağlı aparılan tədqiqatların nəticələrini təqdim etməkdir.

 Yeni nəşr maliyyə-bank sektorunun və iqtisadiyyatın müxtəlif sahələrinin nəzəri-praktik aspektlərini, qlobal iqtisadi proseslərin, iqtisadi inkişafın və iqtisadiyyat elminin müxtəlif məsələlərini özündə əks etdirən məqalələri və tədqiqatları əhatə edir.

Diqqətə çatdırılmışdır ki, jurnal AMB-nin iqtisadi və maliyyə maarifləndirilməsi sahəsində apardığı fəaliyyətinin mühüm elementidir. Onun işıq üzü görməsi iqtisadi məsələlərin elmi cəhətdən öyrənilməsi və qiymətləndirilməsində, iqtisadi nəzəriyyə və praktikanın sintezinə imkan verən yanaşmaların formalaşmasında, cəmiyyətdə iqtisadi biliklərin yayılmasında mühüm rol oynaya bilər.

Burada makroiqtisadiyyat, mikroiqtisadiyyat, monetar iqtisadiyyat, maliyyə-bank sektoru, inkişaf iqtisadiyyatı, sosial sfera kimi sahələrdəki aktual məsələlərin tədqiqinin nəticələri və ən müasir metodoloji açarlar əks olunacaqdır.

Jurnalın ilk nömrəsi AMB-nin internet səhifəsində yerləşdirilir.

Bildirilmişdir ki, AMB-nin müvafiq tədqiqat və analitik strukturları son illər makroiqtisadi siyasətin empirik əsaslarının öyrənilməsi, pul siyasəti və onun təsirlərinin ekonometrik təhlili, makroiqtisadi stimulyasiya və proqnozlaşdırma modellərinin qurulması, bank sektorunda maliyyə dayanıqlığının tədqiqi, qlobal iqtisadiyyatın və müxtəlif sosial-iqtisadi inkişaf məsələlərinin araşdırılması istiqamətində müxtəlif tədqiqat layihələrini həyata keçirirlər.

AzərTAc