Azərbaycan neftinin Rusiya ərazisindən tranziti ilə bağlı həm Azərbaycan, həm də Rusiyaya iqtisadi cəhətdən sərfəli olacaq həll yolu tapılacaq. Trend-in məlumatına görə, bu barədə çərşənbə günü jurnalistlərə açıqlamasında Azərbaycan Respublikası Dövlət Neft Şirkətinin rəhbəri Rövnəq Abdullayev bildirmişdir.

Onun sözlərinə görə, hazırda ARDNŞ-lə Rusiyanın “Transneft” şirkətinin mütəxəssisləri arasında danışıqlar aparılır:

“Tərəflər arasında razılığın əldə olunması bir sıra ticarət məsələlərinin müzakirəsini tələb edir. Hər şeydən əvvəl, lazımi neft həcmlərinin təmin edilməsi üçün neftin keyfiyyət bankı təmin edilməlidir”.

ARDNŞ rəhbəri qeyd etmişdir ki, Azərbaycan tərəfi də həmçinin neftin Rusiya ərazisindən tranziti zamanı itkilərə malik olur. Çünki Novorossiysk kəməri ilə tranzit edilən yüngül Azərbaycan nefti “URALS” markası adı altında ixrac edilir: “Bu da öz növbəsində itkilərə gətirir”.

R.Abdullayev bildirmişdir ki, xüsusilə də üçüncü tərəflər vasitəsilə neftin boru kəməri ilə nəqli imkanları, boru kəmərinin reversi variantı da daxil olmaqla baxılmalı olan başqa məsələlər və imkanlar da var: “Yəni, bütün mümkün variantların iqtisadi effektivliyi nəzərdən keçirilməlidir.

Bu ilin sonuna kimi tərəflər bütün məsələlərə baxacaq və razılaşdıracaqlar. Bunun üçün kifayət qədər vaxt var”.