Kənd Təsərrüfatı Nazirliyində Kanadanın Alberta əyalətinin nümayəndə heyəti ilə görüş keçirilmişdir.

Nazirliyin mətbuat xidmətindən AzərTAc-a bildirmişlər ki, görüşün məqsədi Azərbaycan və Kanada arasında kənd təsərrüfatı, xüsusilə heyvandarlıq sahəsində əməkdaşlıq məsələlərini müzakirə etmək olmuşdur.

Kənd təsərrüfatı nazirinin müavini Aslan Aslanov Azərbaycanın kənd təsərrüfatı sahəsi barədə geniş məlumat vermiş, ölkə başçısı İlham Əliyevin bu sahənin inkişafına göstərilən gündəlik diqqət və qayğısı nəticəsində baş verən dinamik inkişafı qarşı tərəfin diqqətinə çatdırmışdır.

Nazir müavini Azərbaycanda aqrar sahədə həyata keçirilən islahatlar və kənd təsərrüfatı məhsulları istehsalçılarının dəstəklənməsi məqsədilə dövlət yardımları, güzəştli kreditlər nəticəsində yaradılmış münbit şərait barədə məlumat vermiş və aqrar sahə üçün ölkəmizdə əlverişli investisiya mühitinin olduğunu nəzərə çatdırmışdır.

 Görüşdə Azərbaycan ilə Kanada, o cümlədən Alberta əyaləti arasında kənd təsərrüfatı sahəsində əməkdaşlıq imkanları müzakirə edilmişdir.

 Alberta əyalətinin Azərbaycan ilə müxtəlif istiqamətlər üzrə əməkdaşlıqda maraqlı olduğu qeyd edilmiş, mövcud imkanların araşdırılmasının əhəmiyyəti vurğulanmışdır.

Həmçinin, görüşdə Azərbaycanda heyvandarlıq təsərrüfatlarının yaradılması, damazlıq heyvanların gətirilməsi, yem istehsalı və qablaşdırılması üzrə Kanada tərəfinin tanınmış şirkət rəhbərlərinin təqdimatları keçirilmişdir.