Braziliya Federativ Respublikasının Xarici İşlər Nazirliyi baş katibinin əməkdaşlıq, mədəniyyət və ticarətin təşviqi üzrə müavini səfir Hadil da Roşa Viannanın rəhbərlik etdiyi ticarət missiyası mayın 21-də Azərbaycanın Kənd Təsərrüfatı Nazirliyində olmuşdur.

Nazirliyin mətbuat xidmətindən AzərTAc-a bildirmişlər ki, kənd təsərrüfatı nazirinin müavini Aslan Aslanov ilə keçirilmiş görüşdə Azərbaycan və Braziliya arasında kənd təsərrüfatı sahəsində əməkdaşlıq, kənd təsərrüfatı və ərzaq məhsullarının ticarət dövriyyəsinin artırılması üzrə fikir mübadiləsi aparılmışdır.

Nazir müavini hər iki ölkə arasında dostluq əlaqələrinin ulu öndər Heydər Əliyev tərəfindən qoyulduğunu və bu siyasəti Prezident İlham Əliyevin uğurla davam etdirdiyini vurğulamışdır.

A.Aslanov qonaqlara Azərbaycanda kənd təsərrüfatının inkişafı sahəsində görülən işlər, dövlətimizin başçısının diqqət və qayğısı nəticəsində əldə olunan uğurlar barədə ətraflı məlumat vermişdir. Nazir müavini Azərbaycanda aqrar sahədə həyata keçirilən islahatlar və kənd təsərrüfatı məhsulları istehsalçılarının dəstəklənməsi məqsədi ilə edilən dövlət yardımları, güzəştli kreditlər nəticəsində yaradılmış münbit şərait barədə danışmış, ölkəmizdə əlverişli investisiya mühitinin olduğunu demişdir.

Görüşdə Azərbaycan ilə Braziliya arasında aqrar sahədə ikitərəfli əməkdaşlığa dair memorandumun hazırlanması, habelə ölkəmizə çox sayda kənd təsərrüfatı məhsullarının idxalı, o cümlədən heyvandarlıq və quşçuluq sahəsində əməkdaşlığın genişləndirilməsi üzrə müzakirələr aparılmışdır. 

Müzakirələrdə Azərbaycanın Braziliyadakı səfiri Elnur Sultanov iştirak etmişdir.