10 may 2013-cü il tarixində “Azpetrol” şirkəti Sumqayıtda özünün yeni yanacaqdoldurma məntəqəsini açdı. Bu, “Azpetrol”un sayca 81-ci yanacaqdoldurma məntəqəsidir. Yeni məntəqənin açılışında Sumqayıt Şəhər İcra Hakimiyyətinin nümayəndələri və digər qonaqlar  iştirak edirdilər.

Məntəqənin açılışı zamanı “Azpetrol” şirkətinin baş direktoru Hüseynağa Rəhimov öz çıxışında qeyd etdi ki, bu gün şirkətimizin yeni yanacaqdoldurma məntəqəsinin açılışı bütün azərbaycanlılar üçün çox əziz və əlamətdar bir günə - böyük və şərəfli ömrünü Azərbaycan Respublikasının çiçəklənməsinə və qüdrətlənməsinə həsr etmiş ulu öndər Heydər Əliyevin doğum gününə təsadüf etdiyindən xüsusilə əlamətdardır.

Əsası hələ keçən əsrin 70-ci illərindən, yəni ümummilli liderimiz Heydər Əliyevin respublikaya rəhbərlik etməyə başladığı dövrdən qoyulmuş və yaşadığımız günlərdə uğurla davam etdirilən yeni sənaye obyektlərinin açılışı dayanmamış, abadlıq və quruculuq işləri səngiməmiş, əksinə, daha geniş vüsət almışdır.

Hüseynağa Rəhimov onu da vurğuladı ki, özəl sektorun Azərbaycanda gedən uğurlu proseslərdən bəhrələnərək gündən-günə güclənməsi möhtərəm Prezidentimiz cənab İlham Əliyevin birbaşa rəhbərliyi və nəzarəti altında keçirilən uğurlu və ardıcıl iqtisadi siyasətin məntiqi nəticəsidir.

Şirkətin rəhbəri daha sonra qeyd etdi ki, hər bir yeni məntəqənin istifadəyə verilməsi ilə yeni iş yerlərinin açılması məsələsi həll olunur ki, bu da bizim fəaliyyətimizin əsas istiqamətlərindən biridir. Bu baxımdan yeni açılan məntəqənin istifadəyə verilməsi ilə 36 yeni daimi iş yerinin açıldığını xüsusilə qeyd etmək istərdim.

Bu gün istifadəyə verilən yanacaqdoldurma məntəqəsini inşa etdiyimiz zaman biz çalışmışıq ki, bu yeni məntəqə daha zövqlü dizayna və istifadə baxımdan daha əlverişli imkanlara malik olsun.

Azərbaycanda avtomobil yanacağının pərakəndə satışı ilə məşğul olan şirkətlər arasında lider kimi tanınan “Azpetrol” şirkəti olaraq, biz əldə etdiyimiz nailiyyətlərlə kifayətlənmir, daim inkişaf haqqında düşünür və şirkətimizin yanacaqdoldurma məntəqələri şəbəkəsinin genişlənməsi üzrə işlər aparırıq.

Sonra şirəktin rəhbəri H. Rəhimov 2013-cü ildə qazanılan uğurlardan və beynəlxalq təşkilatların şirkətin fəaliyyətinə verdikləri qiymət və mükafatlardan  söz açdı.

“Azpetrol” şirkətinin mətbuat xidməti