Suraxanı Rayon İcra Hakimiyyətinin təşkilatçılığı ilə ümummilli lider Heydər Əliyevin 90 illik yubileyinə həsr olunmuş “Bahar Enerji” Əməliyyat Şirkətində mərasim  keçirilmişdir.

 Tədbir iştirakçıları əvvəlcə şirkətdə ulu öndərin abidəsini ziyarət etmiş və önünə tər güllər düzmüşlər. Sonra konfrans zalında “Dəyirmi masa” təşkil olunmuşdur. “Dəyirmi masa”nı giriş sözü ilə  əməliyyat şirkətinin Xüsusi əməliyyatlar üzrə meneceri Elşad Nəsənov açmışdır. O, qeyd etmişdir ki, ümummilli lider Heydər Əliyevin müstəqil Azərbaycan dövlətçiliyi tarixində milli ənənələrə söykənən iqtisadiyyatın yaradılması, ölkənin iqtisadi potensialının artırılması və  azad sahibkarlar və mülkiyyətçilər təbəqəsinin formalaşmasında müstəsna rolu olmuşdur.

“Dəyirmi masa”da çıxış edən şirkətin xüsusi layihələr və planlaşdırma üzrə meneceri Nazim İsmixanov, Suraxanı Rayon İcra Hakimiyyətinin şöbə müdiri Altun Quliyev və başqaları bildirmişlər ki, hər bir dövlətin milli mənafelərinin, sosial-iqtisadi yüksəlişinin, beynəlxalq əməkdaşlıq məsələlərinin təminatında, xarici təhdidlərin qabaqlanmasında və aradan qaldırılmasında düzgün və çevik xarici siyasət müstəsna əhəmiyyətə malikdir. Azərbaycan dövlətinin ən çətin və ən mürəkkəb mərhələsində, hərbi təcavüz, iqtisadi sarsıntılar, vətəndaş müharibəsi təhlükəsinin yaxınlaşdığı bir dövrdə xalqın təkidli çağırışı ilə hakimiyyətə gələn ümummilli liderimiz dünyanın aparıcı dövlətləri, nüfuzlu beynəlxalq təşkilatları ilə əlaqələri xalqımızın  milli mənafelərinin təmin olunması prinsipləri üzərində quraraq ölkəmizin xarici siyasətini bu təməl üzərində uğurla inkişaf etdirmişdir. Dahi öndərin səyləri nəticəsində gənc və müstəqil Azərbaycan Respublikasının xarici siyasətində əsaslı dönüş yaranmış, diplomatik uğurlar əldə olunmuş, ölkəmiz qısa zaman kəsiyində regionda həlledici sözə malik lider dövlətə çevrilmişdir.

Vaqif  BAYRAMOV,

“Xalq qəzeti”