Bu gün Azərbaycan Mərkəzi Bankı tərəfindən Heydər Əliyevin 90 illik yubileyinə həsr olunmuş tədbir keçirilmişdir.

 Bankdan “APA-Economics”ə verilən məlumata görə, tədbiri giriş nitqi ilə açan Mərkəzi Bankın sədri Elman Rüstəmov qeyd etmişdir ki, Heydər Əliyevin təşəbbüsü və dəstəyi ilə aparılan islahatların mühüm istiqamətlərindən biri də bank quruculuğu olmuşdur. Bank islahatları dövlət banklarının yenidən qurulması, özəl bankların kapitalizasiyası və konsolidasiyası, bank infrastrukturunun formalaşması istiqamətində həyata keçirilmişdir.

E.Rüstəmov bildirmişdir ki, Azərbaycan cəmi 3 il ərzində orta gəlirli ölkələr qrupuna daxil olmuşdur. Halbuki, ən yaxşı təcrübələrdə belə, uğurun müddəti 10 ildən az olmamışdır. Yoxsulluq 50 faizdən 6 faizə enib. İşsizlik tamamilə aradan qalxıb. Sosial həyatın bütün sahələrində ölkə müasirləşməyə başlayıb. Milli iqtisadiyyat ötən dövrdə 3,4 dəfə böyüyüb, orta illik iqtisadi artım tempi dünya üzrə orta artım tempini 3,5 dəfə üstələyərək 13,5 faiz təşkil edib. Ölkədə müasir infrastruktur yaradılmış, regional inkişaf sürətlənib.

2003-cü ildən bəri yüksək inkişaf və iqtisadi artıma adekvat olaraq bank sektoru 17 dəfədən çox böyüyüb, onun maliyyə vasitəçiliyi rolu əhəmiyyətli genişlənib, korporativ sektorun və əhalinin bank maliyyəsinə əlyetərliliyi səviyyəsi əhəmiyyətli dərəcədə artıb. Bank sektoruna inam əhəmiyyətli şəkildə yüksəlib, əmanət bazası 5 milyard manatı keçib. Hazırda ölkədə 2 milyon nəfər əmanətçi var.