“PAŞA Həyat Sığorta” ASC-nin əməkdaşları aprelin 18-19-da Qazaxıstanın Almatı şəhərində keçirilmiş “Risklərin idarə olunması üzrə IX Beynəlxalq Konfrans”da iştirak etmişlər.

Şirkətin marketinq və ictimaiyyətlə əlaqələr şöbəsindən verilən məlumata görə, tədbirdə “PAŞA Həyat Sığorta” ASC-ni şirkətin risklərin idarə olunması şöbəsinin müdiri Pərviz Quliyev və həmin şöbənin mütəxəssisi Tural Həsənov təmsil etmişdir.

Konfransa müxtəlif ölkələrin, o cümlədən Rusiya, Özbəkistan, Belarus, Böyük Britaniya, ABŞ, Fransa, İsveçrə, Hindistan, Birləşmiş Ərəb Əmirlikləri, Misir, Türkiyə və digər dövlətlərin nümayəndələri həm iştirakçı, həm də spiker qismində qatılıblar.

Tədbir çərçivəsində “Risklərin idarə olunması” mövzusu ilə yanaşı, energetika, qlobal neft sektoru, sığorta və təkrarsığorta bazarının perspektivləri, Mərkəzi Asiyada maliyyə sabitliyi, həmçinin Çin iqtisadiyyatının inkişaf perspektivləri və digər mövzular ətrafında maraqlı müzakirələr və fikir mübadiləsi aparılmışdır.

Qeyd edək ki, konfransda Azərbaycanı üç sığorta şirkəti təmsil etmişdir.

Qabil YUSİFOĞLU,

“Xalq qəzeti”