Azərbaycanda yeni yaradılacaq polad istehsalı kompleksi ölkə sənayesində yeni sahənin inkişafını təmin edəcək.

“APA-Economic”in məlumatına görə, bunu Azərbaycanın sənaye və energetika naziri Natiq Əliyev demişdir.

Onun sözlərinə görə, Azərbaycanda polad sənayesinin inkişafı üçün baza artıq mövcuddur. Belə ki, ölkənin poladəritmə sahəsində təcrübəsi var, bu da polad istehsalı sahəsinin inkişafına təkan verəcək: “Dövlət başçısı tərəfindən Azərbaycanda polad istehsalı kompleksinin yaradılması haqqında imzalanmış sərəncam ölkədə yeni sənaye erasını açır. Hazırda ölkədə sənaye sahəsində yüzlərlə kiçik və orta müəssisə fəaliyyət göstərir. Lakin böyük və strateji müəssisələr o qədər də çox deyil. Ötən illər ərzində Azərbaycan iqtisadiyyatı neft-qaz sənayesi üzərində qurulmuşdur, hazırda isə ölkədə qeyri-neft sektorunun sürətlə inkişaf etdirilməsi istiqamətində mühüm işlər görülür”.

N.Əliyev onu da qeyd etmişdir ki, qeyri-neft sektorunun inkişafı asan məsələ deyil və bu sektoru inkişaf etdirmək üçün irihəcmli investisiyalar cəlb olunmalıdır: “Hazırda Azərbaycanın bu sektora yatırdığı investisiyaların həcmi xarici sərmayəni ötüb keçmişdir. Lakin buna baxmayaraq, Azərbaycan iqtisadiyyatı xarici investorlar üçün hər zaman açıqdır”.