Xəbər verdiyimiz kimi, aprelin 24-də Latviya Respublikasının Prezidenti Andris Berzinşin ölkəmizə rəsmi səfəri çərçivəsində İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə Azərbaycan-Latviya biznes forumu keçirilmişdir.

AzərTAc xəbər verir ki, forumda Azərbaycan və Latviya tərəfdən rəsmi şəxslərlə yanaşı, sənaye, kənd təsərrüfatı və qida sənayesi, informasiya-kommunikasiya texnologiyaları, turizm, sığorta, səhiyyə, tikinti, təhsil, konsaltinq, maliyyə, nəqliyyat, logistika, energetika və digər sahələrdə fəaliyyət göstərən 200-ə yaxın iş adamı iştirak etmişdir.

Biznes forumda Azərbaycan-Latviya iqtisadi-ticarət əlaqələri barədə məlumat verilmiş, bu cür tədbirlərin əməkdaşlığın daha da genişləndirilməsində, iş adamları arasında əlaqələrin inkişafında əhəmiyyəti vurğulanmışdır. Tədbirdə hər iki ölkənin biznes və investisiya imkanları barədə məlumat verilmiş, təqdimatlar edilmişdir. Forum çərçivəsində Azərbaycanın “Ultra” və “Babilion” şirkətləri ilə Latviyanın “DPA” və “Layma” şirkətləri arasında qarşılıqlı əməkdaşlıq haqqında Anlaşma memorandumları imzalanmışdır.

Biznes forumda Azərbaycan və Latviya iş adamları arasında ikitərəfli görüşlər keçirilmişdir.