Aprelin 22-də Azərbaycanda səfərdə olan Gürcüstanın Maliyyə Nazirliyinin Gəlirlər Xidmətinin rəisi Laşi Xuçişvilinin başçılıq etdiyi nümayəndə heyəti Dövlət Gömrük Komitəsinin (DGK) sədri, gömrük xidməti general-leytenantı Aydın Əliyev ilə görüşmüşdür.

Görüşdə iki ölkə arasında əlaqələrin uğurla inkişaf etdiyi vurğulanmış, gömrük sahəsində əməkdaşlığın perspektivləri müzakirə edilmişdir.

A.Əliyev bildirmişdir ki, Azərbaycan  ilə Gürcüstan arasında dostluq və qardaşlıq münasibətləri mövcuddur və bu əlaqələr uğurla inkişaf edir. Regionda həyata keçirilən birgə layihələr bunun bariz nümunəsidir.

Azərbaycan ilə Gürcüstan arasında ticarət dövriyyəsindən danışan A.Əliyev diqqətə çatdırmışdır  ki, 2009-cu ildə bu rəqəm 450 milyon ABŞ dolları olduğu halda, ötən il 700 milyon dolları ötmüşdür. Bu ilin 3 ayında isə ticarət dövriyyəsinin həcmi artıq 200 milyon dollara yaxınlaşmışdır.

Bakıya ilk dəfə səfər etdiyini söyləyən Laşi Xuçişvili paytaxtımızın çox gözəl olduğunu bildirmişdir. Münasibətlərimizin daim inkişaf etdiyini deyən L.Xuçişvili vurğulamışdır ki, bu səfər  əlaqələrin daha da güclənməsinə töhfəsini verəcəkdir.