Aprelin 7-də Bakıda “Cənubi Qafqaz və Mərkəzi Asiya: 2020-ci ilə baxış” mövzusunda Dünya İqtisadi Forumu (Davos Forumu) çərçivəsində “Coca-Cola” şirkətinin rəsmiləri ilə görüş keçirilmişdir.

AzərTAc xəbər verir ki, görüşdə Cənubi Qafqaz və Mərkəzi Asiya ölkələrindən 80-dən çox gənc iş adamı, hökumət rəsmiləri, alimlər, beynəlxalq təşkilatların nümayəndələri və tələbələr iştirak etmişlər.

Tədbirdə çıxış edən “Coca-Cola” şirkətinin Türkiyə, Cənubi Qafqaz və Mərkəzi Asiya üzrə prezidenti, Beynəlxalq Füturoloqlar Dərnəyinin idarə heyətinin üzvü Qalya Frayman Molinas, şirkətin Qafqaz və Mərkəzi Asiya üzrə baş meneceri Luici Panaino region ölkələrinin gəncləri arasında dialoqun qurulması baxımından görüşün əhəmiyyətini qeyd etmişlər.

Azərbaycanda gənclərə göstərilən diqqət və qayğını yüksək qiymətləndirən Q.Molinas müasir dövrdə onların ölkə həyatının bütün sahələrində fəal iştirak etdiyini bildirmişdir. O, liderlik xüsusiyyətlərinə malik, mükəmməl vətəndaş mövqeyi olan gənclərin formalaşmasında bu cür görüşlərin rolunu vurğulamışdır.

 Q.Molinas demişdir: “Bu gün gənclərə liderlik keyfiyyətlərinin aşılanması olduqca vacibdir. Azərbaycan gənclər ölkəsidir. Bu baxımdan gənclər dünyada baş verən hadisələrə daha geniş geosiyasi anlamda yanaşmalıdırlar. Odur ki, bu cür seminarların, fikir mübadilələrinin keçirilməsinə böyük ehtiyac vardır”.

Daha sonra çıxış edən Luici Panaino qeyd etmişdir ki, bu cür görüşlərin ənənəvi hal alması çox sevindiricidir. Bu görüşlər əməkdaşlığın inkişafına şərait yaradır, kreativ ideyaların həyata keçirilməsinə, yeni layihələrin reallaşmasına kömək edir.

Bildirilmişdir ki, artıq dünyanın 145 şəhərində “Global Shapers Community”nin şəbəkəsi qurulmuşdur. Bakı da həmin şəhərlərdən biridir.