İKT sahəsində gözlənilən startaplar “bum”u əsasən gənclərin sırasından yeni milyonçuların meydana çıxması ilə nəticələnə bilər. Bu barədə İKT İnformasiya Mərkəzinin direktoru Fərid Kazımov məlumat vermişdir. Onun sözlərinə görə, İKT sektorun bu seqmenti, xüsusən də internet sahəsində olan biznes yaxşı potensiala malikdir.

“İnternet-biznes baxımından, son illər Azərbaycan bazarında sərmayələr internet-mediaya yönəlirdi, halbuki internet sahəsi daha genişdir və bu bazarın həcmi yaxın 5 il ərzində dəfələrlə arta bilər. Hazırda bazarda dəyəri bir milyon ABŞ dollarını keçən bir neçə internet-biznes mövcuddur və bu cür layihələrin sayı tədricən artacaq”, - deyə ekspert qeyd etmişdir.

İnvestorların marağına səbəb ola biləcək internet-layihəsinin yaradılması üçün ən optimal yol startaplar müsabiqsəində iştirakdır. Məhz bu cür müsabiqələr çərçivəsində gənç proqramçılardan ibarət olan komandalar öz ideyalarını və ya artıq fəaliyyət göstərən internet-layihələrini gözlənilən gəlirlər baxımından investorların marağına səbəb ola biləcək davamlı biznes-model üçün irəli sürə bilərlər. Misal üçün, qeyd olunan məsələləri hazırda keçirilən “Startup Azerbaijan” müsabiqəsində gerçəkləşdirmək mümkündür. İlk dəfə olaraq sözügedən müsabiqə bütün marağı olan tərəflərin, o cümlədən investor və mentorların cəlbi ilə tələb olunan standartlar üzrə keçirilir.

F.Kazımov bildirmişdir ki, “Mövcud vəziyyətin təhlili göstərir ki, artıq Azərbaycanda perspektivli layihələrə bir milyon ABŞ dolları həcmində sərmayə yatırmağa hazır olan real investorlar var. Lakin bununla belə maraqlı layihələrin sayı çox azdır. Sadəcə istifadəçilərin maraqlarını cəlb etmək məqsədilə yüzlərlə saytların yaradılması dövrünü əhatə edən son 10-15 ilin “internet-idelizmi”ndən fərqli olaraq hazırkı mərhələdə vəziyyət tam başqadır – sayt və ya proqram real qazanmaq imkanına malik olmalıdır. Bunu isə azərbaycanlı startaperlər hələ daha mükəmməl öyrənməlidirlər.

Qabil YUSİFOĞLU,
“Xalq qəzeti”