Azərbaycan Dövlət Neft Fondu (ARDNF) Beynəlxalq Maliyyə Korporasiyası (IFC) və digər suveren və pensiya fondları ilə birgə yeni yaradılmış IFC-nin Qlobal İnfrastruktur Fonduna sərmayə yatırmağa başlayıb.

ARDNF-dən “APA-Economics”ə verilən məlumata görə, sözügedən fond sərmayəçilərə inkişaf etməkdə olan bazarlarda infrastruktur layihələrinə və infrastruktur sahəsində fəaliyyət göstərən şirkətlərə investisiya yatırımları üçün nəzərdə tutulub.

IFC-nin Aktivlərin İdarəedici Şirkəti tərəfindən idarə olunacaq Qlobal İnfrastruktur Fondu enerji, nəqliyyat, kommunal xidmətlər, telekommunikasiya, şəhər infrastrukturu və infrastruktur xidmətləri sahəsində fəaliyyət göstərən şirkətlərə investisiya yatırımına imkan verəcək.

İlkin tranşda IFC-nin Qlobal İnfrastruktur Fondu 500 milyon ABŞ dolları məbləğində vəsaiti idarə edəcək ki, bu vəsaitin də 150 mln. dolların ARDNF tərəfindən ayrılması nəzərdə tutulur və Fond son tranşa qədər yatırımlarını 200 mln. dollara çatdırmağı planlaşdırır.

Qeyd edək ki, ARDNF 2010-cu ildə IFC-nin Aktivlərin İdarəedici Şirkəti tərəfindən idarə edilən Afrika, Latın Amerikası və Karib Fonduna 100 mln. dollar, 2012-ci ildə isə IFC-nin Katalizator Fonduna 50 mln. dollar məbləğində sərmayə yatırıb.