Kompyuter təhlükəsizliyi sahəsində fəaliyyət göstərən Sophos şirkətinin ekspertləri dünyada 2226 nəfər arasında sorğu keçirərək insanların getdikcə daha çox mobil qurğular gəzdirdiklərini müəyyən etmişlər. Belə ki, hazırda adambaşına orta hesabla 2,9 ədəd mobil qurğu düşür.

DailyComm-un məlumatına görə, tədqiqata Avstraliya, Kanada, Almaniya, ABŞ və Böyük Britaniya sakinləri cəlb olunmuşlar. Qurğulardan ən çox istifadə edənlər arasında almanlar çoxluq təşkil edirlər. Sorğunun nəticələri göstərir ki, onlar özləri ilə orta hesabla 3,1 mobil qurğu gəzdirirlər və bu qurğulardan    biri noutbukdur. Bu göstərici üzrə ikinci yerdə amerikalılar (adambaşına 3 mobil qurğu) dururlar. Sonrakı yerlərdə müvafiq olaraq 2,7 və 2,6 mobil qurğu ilə kanadalılar və avstraliyalılar gəlir. Onlar daha çox smartfonlara diqqət yetirirlər.

 Respondentlərin 85 faizi smartfona malik olduğundan bu aparat ən populyar qurğu seçilmişdir. 29 faizlik göstərici ilə oxu qurğuları da populyar hesab olunmuşdur. Sorğuda iştirak edənlərin müvafiq olaraq 68, 48 və 40 faizi noutbuk, planşet kompyuter və MP3 pleyerlərə malikdirlər.

Təhlükəsizlik sahəsində mütəxəssis kimi Sophos əsas diqqəti daha çox qurğu alan insanların onlardan tez-tez iş üçün istifadə etmələrinə yönəldir və qurğuların kibercinayətkarlardan etibarlı mühafizəsinin xüsusi əhəmiyyət kəsb etdiyini vurğulayır.

Samirə ƏLİYEVA,
“Xalq qəzeti”