Ötən il London, Paris və Moskva şəhərlərində daşınmaz əmlak alan Azərbaycan Dövlət Neft Fondu (ARDNF) Cənub-Şərqi Asiya və Türkiyədə də əmlak alınmasını davam etdirməklə daşınmaz əmlaka yatırdığı investisiyaları genişləndirmək niyyətindədir.

“APA-Economics”in məlumatına görə, bu barədə ARDNF-in Vəsaitlərin idarə edilməsi müdiriyyətinin başçısı İsrafil Məmmədov “Bloomberg” agentliyinə açıqlama vermişdir.

 Onun sözlərinə görə, 2012-ci ildə daşınmaz əmlaka 600 milyon ABŞ dolları xərcləyən ARDNF ümumilikdə daşınmaz əmlaka yatırılan investisiyaları 1,6-1,7 milyard dollara və ya ümumi investisiya portfelinin 5%-nə çatdırmaq niyyətindədir.

“Hazırkı prioritet Cənub-Şərqi Asiya ölkələridir. Bizim daşınmaz əmlaka investisiya strategiyasına gəldikdə isə əsas məsələ yüksək bazar şəffaflığı, dərinlik, likvidlik və uzunmüddətli icarə təcrübəsinə malik olan əsas paytaxt şəhərlərində baş ofis ərazilərinə investisiya yatırmaqdır”, - deyə İ.Məmmədov bildirmişdir.