Berlindəki Mədəniyyət Diplomatiyası İnstitutunda təşkil olunan “Berlin İqtisadi Konqresi-2013” çərçivəsində “İqtisadi şaxələndirmə: İnkişafın Azərbaycan modeli” adlı mühazirə axşamı keçirilmişdir.

Azərbaycan Respublikasının AFR-dəki səfiri Pərviz Şahbazovun məruzəçi qismində çıxış etdiyi tədbirdə Almaniyada fəaliyyət göstərən diplomatik missiyaların, qeyri-hökumət təşkilatlarının nümayəndələri, Berlinin müxtəlif ali məktəblərinin əməkdaşları və tələbələri iştirak etmişdirlər.

Səfir P.Şahbazov çıxışında müstəqilliyinin ilk illərində Azərbaycanın iqtisadi inkişafının qarşılaşdığı problemlər və onların aradan qaldırılması üçün ölkədə aparılmış islahatlar barədə tədbir iştirakçılarını ətraflı məlumatlandırmışdır. Səfir əsası 1994-cü ildə ümummilli lider Heydər Əliyev tərəfindən qoyulmuş uğurlu neft strategiyasının Azərbaycanın bugünkü iqtisadi inkişafı üçün möhkəm zəmin yaratdığını vurğulayaraq, həmin ildən bəri ölkəmizin sosial-iqtisadi inkişafında əldə olunmuş nailiyyətlər, xüsusilə iqtisadiyyatın şaxələndirilməsi, innovativ iqtisadiyyatın yaradılması, insan kapitalının inkişaf etdirilməsi istiqamətində görülmüş işlərin verdiyi nəticələr barədə geniş söhbət açmışdır. O bildirmişdir ki, hazırda ölkənin biznes mühiti çox cazibədardır. Səfir məruzədə, həmçinin ölkəmizin Avropanın enerji təhlükəsizliyində oynadığı rol haqqında da danışmış, Avropa İttifaqının “Cənub” qaz dəhlizinin yaradılmasına Azərbaycan tərəfinin verdiyi töhfələri tədbir iştirakçılarının diqqətinə çatdırmışdır.

Məruzədən sonra P.Şahbazov tədbir iştirakçıları tərəfindən Ermənistan-Azərbaycan, Dağlıq Qarabağ münaqişəsi, Türkiyənin Cənubi Qafqazda rolu və digər mövzulara dair ünvanlanmış suallara cavab vermişdir.

 Vüqar SEYİDOV,

AzərTAc-ın xüsusi müxbiri

Berlin