Martın 13-də ARDNŞ-in baş ofisində “Samsung Engineering Co. Ltd.” şirkəti ilə Dövlət Neft Şirkəti arasında karbamid istehsalı zavodunun inşası məqsədilə Layihələndirmə, satınalma və tikinti müqaviləsi imzalanmışdır.

Müqaviləni Azərbaycan Respublikası Dövlət Neft Şirkətinin prezidenti Rövnəq Abdullayev və “Samsung Engineering Co. Ltd.” şirkətinin prezidenti və baş icraçı direktoru Ki Seok Park imzalamışlar.

Dövlət Neft Şirkətindən aldığımız məlumatda bildirilir ki, tərəflər bu sənədin perspektivini yüksək qiymətləndirirlər. Bildirilmişdir ki, müqavilə çərçivəsində “Samsung Engineering Co. Ltd” şirkəti zavodun tikintisini başa çatdırdıqdan sonra bütün lazımi sınaqları həyata keçirərək “açar təhvili” əsasında zavodu tam istifadəyə hazır şəkildə Dövlət Neft Şirkətinə təhvil verəcəkdir.

Müqavilə çərçivəsində “Samsung Engineering Co. Ltd.” zavodun tikinti-quraşdırma işlərini aparacaq, müvafiq sınaqlar həyata keçirəcək və zavodun istismarı zamanı yarana biləcək problemlərin aradan qaldırılması məqsədilə işçilərə xüsusi treninqlər təşkil edəcək.

Samirə ƏLİYEVA,
“Xalq qəzeti”