Azərbaycan Dövlət Neft Şirkəti (ARDNŞ) tərəfindən ölkədə neft hasilatının artırılması ilə bağlı proqram hazırlanır və onun reallaşdırılmasına artıq aprel ayının əvvəlində başlanacaq.

Bunu ARDNŞ-in prezidenti Rövnəq Abdullayev bəyan etmişdir.

 R.Abdullayev bildirmişdir ki, bu layihənin həyata keçirilməsi nəticəsində ARDNŞ-in neft yataqlarında hasilatı ildə 1-2 milyon ton artırmaq mümkün olacaq. Hasilatın artırılması üzrə işlər ARDNŞ-in köhnə dəniz yataqlarında, o cümlədən “Neft Daşları”, “28 May”, “Nərimanov” və “Abşeron” dəniz sahələrində aparılacaq. Hasilatın artımına yeni texnologiyaların tətbiqi ilə nail olunacaq.

 R.Abdullayev qeyd etmişdir ki, ARDNŞ tərəfindən bu həftənin əvvəlində baş verən avrobondların yerləşdirilməsindən daxil olan vəsaitlər əvvəlki kreditlərin qaytarılması ilə yanaşı, həm də neft hasilatının artırılması üçün istifadə ediləcək.

 Xatırladaq ki, martın 11-də Azərbaycan Dövlət Neft Şirkəti CEEMEA bazarında 10 illik tədavül müddəti olan 1 milyard dollar həcmində avrobond emissiyasını yerləşdirmişdir. Bu, şirkətin investisiya bazasını möhkəmlədəcək ikinci beynəlxalq əməliyyatdır. ARDNŞ-in ilk avrobond buraxılışı 2012-ci ilin fevralında həyata keçirilmişdir. O zaman 500 milyon dollar məbləğində avrobond yerləşdirilmişdi.