Azərbaycanın ABŞ-dakı səfirliyinin təşəbbüsü ilə ABŞ Senatında Ceymstaun Fondunun eksperti Vladimir Sokorun iştirakı ilə “Cənub qaz dəhlizi” mövzusunda brifinq keçirilmişdir.

Səfirlikdən Trend-ə verilən məlumata görə, brifinqdə Senatın xarici əlaqələr və enerji komitələrində təmsil olunan senatorların köməkçiləri iştirak etmişlər.

Brifinqdə Sokor Cənub qaz dəhlizinin Avropanın enerji təhlükəsizliyi baxımından əhəmiyyətindən və Azərbaycanın bu layihədəki aparıcı rolundan ətraflı bəhs etmişdir.

O, Azərbaycan qazının ilk dəfə Avropa bazarına daxil olmasının Avropanın hazırkı enerji asılılığının azaldılması baxımından əhəmiyyətini yüksək dəyərləndirmişdir.

Sokor bu layihənin iqtisadi baxımdan səmərəliliyini qeyd etməklə yanaşı, ümumilikdə regionun təhlükəsizlik mühitinə müsbət təsir edəcəyini vurğulamışdır.

Ekspert “Cənub qaz dəhlizi” layihəsinin ABŞ-ın maraqlarına cavab verdiyini bildirərək Vaşinqtonun bu layihəni dəstəkləməsinin vacibliyini qeyd etmişdir.