İstanbulda Bakı-Tbilisi-Qars (BTQ) dəmir yolu ilə bağlı Azərbaycan, Türkiyə və Gürcüstanın nazirləri Ziya Məmmədov, Binəli Yıldırım və George Kvirikaşvilinin başçılıq etdikləri nümayəndə heyətlərinin toplantısı keçirilmişdir. Toplantının yekununda inşaat işlərinin sürətləndirilməsi haqqında protokol imzalanmışdır.

İmzalama mərasimindən sonra çıxış edən Azərbaycanın nəqliyyat naziri Ziya Məmmədov bildirmişdir ki, BTQ layihəsi ilə həm dəmir yolu şəbəkəsinin infrastrukturu, həm də avadanlıqları yenilənmişdir. Bu ilin sonunadək bütün işlər tamamlanacaqdır. BTQ layihəsi təkcə iqtisadi deyil, həm də strateji layihədir. Bu dəmir yolu qitələrin birləşdirilməsi deməkdir. Biz, Avropa ilə Asiyanın birləşməsində yeni bir nəqliyyat dəhlizinin yaranmasına töhfə veririk. 

Türkiyənin nəqliyyat, dənizçilik və informasiya naziri Binəli Yıldırım isə demişdir ki, bizim hədəfimiz 2013-cü ilin sonunadək Bakı-Tbilisi-Qars dəmir yolunda sınaq səfərlərinə başlamaqdır. İnfrastruktur işləri tamamilə başa çatmasa da, işlərin əksəriyyəti görülmüşdür. Bu dəmir yolu layihəsi həm də Azərbaycan, Türkiyə və Gürcüstanın qardaşlıq rəmzidir. BTQ dəmir yolunun inşası başa çatdıqdan sonra Qarsla Naxçıvan arasında dəmir yolu layihəsi də həyata keçiriləcəkdir.

Gürcüstanın iqtisadiyyat və davamlı inkişaf naziri George Kvirikaşvili də BTQ layihəsinin üç ölkə arasında əlaqələri gücləndirəcəyini söyləmişdir. O, Azərbaycan dövlətinə maliyyə məsələlərində dəstəyinə görə təşəkkürünü bildirmişdir.

Oqtay BAYRAMOV,
AzərTAc-ın xüsusi müxbiri
Ankara