İyulun 5-də Bakıda Azərbaycan Xarici İşlər Nazirliyinin və Azərbaycan-NATO Beynəlxalq Məktəbinin (NİSA) birgə təşkilatçılığı ilə "Maliyyə təhlükəsizliyi" mövzusunda növbəti yay sessiyası işə başlamışdır.
Ənənəvi olaraq təhlükəsizliyin müxtəlif sahələrini əhatə edən Azərbaycan-NATO Beynəlxalq Məktəbinin builki sessiyasında yerli, eləcə də NATO-ya üzv və tərəfdaş 20-dən artıq ölkədən məruzəçilər iştirak edir.
Tədbirdə Rumıniyanın Azərbaycandakı səfiri, NATO-nun ölkəmizdəki əlaqələndiricisi Nikolaye Ureke bildirmişdir ki, sessiyanın keçirilməsində əsas məqsəd qlobal maliyyə və iqtisadi təsirin kontekstində maliyyə təhlükəsizliyi probleminin aktuallığını nəzərə alaraq, müzakirə və fikir mübadiləsi aparmaq, habelə, praktiki məşğələlər keçirməkdir.
Tədbirin əhəmiyyətini vurğulayan N.Ureke NATO-Azərbaycan əlaqələrinə də toxunmuşdur. Diplomat Rumıniyanın ölkəmizdəki səfirliyinin NATO ilə Azərbaycan arasında əlaqələndirici qismində fəaliyyətinin uğurla davam etdiyini söyləmişdir. O, ikitərəfli əməkdaşlığın bundan sonra daha da dərinləşməsinə çalışacağını söyləmişdir.
Sessiyada NATO-ya üzv ölkələrin Azərbaycanda akkreditə olunmuş diplomatik missiyalarının nümayəndələri də iştirak edirlər.
Tədbir iyulun 10-dək davam edəcəkdir.