2012-ci il Azərbaycan-Böyük Britaniya münasibətlərində pozitiv il olmuşdur.

Bunu APA-ya açıqlamasında Böyük Britaniyanın Azərbaycandakı səfiri Piter Beytman demişdir.

Onun sözlərinə görə, ötən il bp şirkəti ilə bağlı fikir ayrılıqlarından yaranmış problemlər artıq arxada qalıb: “Biz meydana çıxan istənilən problemi həll etmək gücündəyik. Düşünürəm ki, Azərbaycan-bp tərəfdaşlığı indiyə qədərkindən daha güclü olacaq. Tərəflər “Şahdəniz II” layihəsində və “Cənub dəhlizi” vasitəsilə Avropaya qaz nəqlində uğur qazanmaq istəyirlər. Bu cür layihələrin özünəməxsus çətinlikləri olur və fikir ayrılıqlarının olması da təbiidir. Çox şadıq ki, tərəflər arasındakı bütün fikir ayrılıqları aradan qaldırılıb və biz artıq gələcəyə baxırıq".

Səfir qeyd etmişdir ki, 2013-cü ildə Böyük Britaniyadan Azərbaycana nazirlər səviyyəsində səfərlər gözlənilir. O, erməni separatçılarının Xocalı aeroportunu istifadəyə vermək cəhdləri ilə bağlı suala cavab olaraq bildirmişdir ki, Böyük Britaniya sülh danışıqları prosesinə zərbə vuran istənilən addımdan təəssüf hissi keçirir.

P.Beytman Britaniya şirkətlərinin 2015-ci ildə Bakıda keçiriləcək Avropa Oyunlarının menecment və idman məsələlərində iştirakına ümid etdiyini vurğulamışdır: “Böyük Britaniya ötən ilin may ayında Londonda keçirilən Olimpiya oyunlarından sonra bu sahədə böyük təcrübəyə malikdir. Ümid edirik ki, Britaniya Avropa Oyunlarının yüksək səviyyədə təşkil olunmasında Bakıya kömək edəcək. Artıq bununla bağlı Bakıya bir sıra səfərlər olmuşdur”.