Yanvarın 30-da Azərbaycan Mərkəzi Bankı və Beynəlxalq Maliyyə Korporasiyasının birgə təşkilatçılığı ilə “Əməliyyat risklərinin idarəedilməsi” mövzusunda seminar keçirilmişdir.

Qurumdan AzərTAc-a bildirmişlər ki, üç gün davam edən seminarda əməliyyat risklərinin idarəedilməsinin təşkili, müəyyənləşdirilməsi alətləri, ölçülməsi, təhlili, idarəetmə tədbirləri və digər məsələlər müzakirə edilmişdir. Seminarın gedişində iştirakçılar ilə praktiki məşğələlər (“case study”) aparılmışdır. Seminarda risklərin idarəedilməsi üzrə kommersiya banklarının rəhbər vəzifəli şəxsləri və aparıcı risk mütəxəssisləri, habelə Mərkəzi Bankın aidiyyəti struktur bölmələrinin əməkdaşları iştirak etmişlər.