Azərbaycanın müstəqilliyi dövründə ölkə iqtisadiyyatına ümumilikdə 140 milyard ABŞ dollarından çox investisiya qoyulmuşdur.“APA -Economics”in yaydığı xəbərə görə bu barədə iqtisadi inkişaf naziri Şahin Mustafayev açıqlama vermişdir.

 Ş.Mustafayevin sözlərinə görə, son illər Azərbaycanda müşahidə olunan inkişaf, iri regional və beynəlxalq layihələrin həyata keçirilməsi, müxtəlif infrastruktur layihələrinin icrası Azərbaycan iqtisadiyyatına investisiya qoyuluşu üçün əlverişli şərait yaratmış, ölkəni investorlar üçün daha cəlbedici etmişdir: “Ötən il 13,3 milyard dolları daxili və 8,8 milyard dolları xarici olmaqla ölkə iqtisadiyyatına 22,1 milyard dollar həcmində investisiya yatırılmışdır”.

 Azərbaycan iqtisadiyyatının inkişafı ölkənin maliyyə ehtiyatlarının artmasına səbəb olmuşdur ki, bu da öz növbəsində, xarici ölkələrə sərmayə qoyuluşu üçün əlverişli şərait yaratmışdır. Ş.Mustafayev vurğulamışdır ki, artıq Azərbaycan sərmayədar ölkə kimi tanınır.

Hazırda Azərbaycanın dövlət və özəl şirkətləri xarici ölkələrdə neft-kimya, qaz, yol və digər layihələrdə iştirak edir, xaricdə yatırılan investisiyaların dinamikasında müsbət irəliləyiş müşahidə olunur.