Ötən il Türkiyə və Azərbaycan arasında ticarət dövriyyəsi 4 milyard dollardan artıq olmuşdur.

“APA-Economics”in məlumatına görə, bunu Türkiyənin Azərbaycandakı səfirliyin konsulu Rıza Kağan Yılmaz bildirmişdir.

Onun sözlərinə görə, Türkiyə və Azərbaycanın hədəfi ticarət dövriyyəsini 10 milyard dollara çatdırmaqdır: “Hər iki ölkədən investisiyaların həcmi 10 milyard dollardan çoxdur. Yaxın dövrdə bu göstərici artacaq. Çünki SOCAR Türkiyədə böyük işlər görür. Hazırda Türkiyə Azərbaycanla birgə TANAP, Bakı-Tiflis-Qars dəmir yolu layihələrini həyata keçirir. Bu da əsas verir ki, investisiyaların həcmi yüksəlsin”.

Rıza Yılmaz qeyd etmişdir ki, hazırda Azərbaycanın 1000 şirkəti Türkiyədə qeydiyyatdan keçmişdir: “Azərbaycanda da 1000 türk şirkəti fəaliyyət göstərir. Bu şirkətlər böyük işlər görür və iki ölkə arasında iqtisadi əlaqələrin daha da inkişaf etməsinə töhfələr verirlər”.