Azərbaycan Respublikası Dövlət Neft Fondunun (ARDNF) 2012-ci ildə büdcə gəlirləri 13 673,7 milyon manat, büdcə xərcləri isə 10 573,6  milyon manat olmuşdur.

ARDNF-in mətbuat xidmətindən AzərTAc-a bildirmişlər ki, 2012-ci ildə fondun neft və qaz sazişlərinin həyata keçirilməsi ilə bağlı gəlirləri 13 130,1 milyon manat, o cümlədən mənfəət neftinin və qazın satışından 13 117,4  milyon manat, tranzit gəlirləri 7,9 milyon manat, bonus ödənişləri 1,6 milyon manat, akrhesabı ödənişlər 3,0 milyon manat, xarici sərmayəçilər tərəfindən təhvil verilmiş aktivlərdən 0,2 milyon manat təşkil etmişdir.

Ötən il ARDNF-in vəsaitlərinin idarə edilməsindən əldə olunan gəlirlər 543,6 milyon manata bərabər olmuşdur.

Valyuta məzənnələrinin dəyişməsindən yaranan fərq ilə bağlı Fondun büdcədənkənar gəliri 253,8 milyon manat təşkil etmişdir.

Hesabat dövrü ərzində fondun 2012-ci il büdcəsinin icrası çərçivəsində 9 905,0 milyon manat vəsait dövlət büdcəsinə transfert edilmişdir. Qaçqın və məcburi köçkün ailələrinin məskunlaşdırılması və sosial-məişət vəziyyətinin yaxşılaşdırılması üzrə tədbirlərin həyata keçirilməsinə 300,0 milyon manat, Samur-Abşeron suvarma sisteminin yenidən qurulmasına 200,0 milyon manat vəsait ayrılmışdır. “Bakı-Tbilisi-Qars yeni dəmir yolu” layihəsinin maliyyələşdirilməsinə Neft Fondundan 119,0 milyon manat vəsait ayrılmışdır. “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”nın maliyyələşdirilməsinə  20,0 milyon manat vəsait yönəldilmişdir.  Ötən 2012-ci il ərzində ARDNF-in idarə edilməsi ilə bağlı xərcləri 29,6 milyon manat təşkil etmişdir.

Cari il yanvarın 1-nə fondun aktivləri 2012-ci ilin əvvəlinə (29 800,0 milyon ABŞ dolları) nisbətən 14,5 faiz artaraq 34 129,4 milyon ABŞ dollarına bərabər olmuşdur.

Ötən ilin I rübündən etibarən ARDNF qızılın alınmasına başlamışdır və 2013-cü il yanvarın 1-nə fond tərəfindən alınmış qızılın miqdarı 14 ton 934 kiloqram (480 146 troy unsiya) təşkil etmişdir.