Azərbaycan Respublikasının xarici işlər naziri Elmar Məmmədyarov bp şirkətinin Azərbaycan, Gürcüstan və Türkiyə regionu üzrə prezidenti Qordon Birrel və xarici işlər və təhlükəsizlik məsələləri üzrə vitse-prezidenti Hüseyn Məmmədov ilə görüşmüşdür.

Xarici İşlər Nazirliyindən AzərTAc-a bildirmişlər ki, görüşdə Azərbaycan ilə bp şirkəti arasında əməkdaşlıqdan, birgə həyata keçirilən layihələrdən söz açılmış, Xəzər dənizinin Azərbaycan Respublikasına aid hissəsində, o cümlədən Azəri-Çıraq-Günəşli yataqlarında bp şirkətinin operatoru olduğu Beynəlxalq Əməliyyat Şirkəti tərəfindən görülməsi nəzərdə tutulan işlər barədə fikir mübadiləsi aparılmışdır.

Qordon Birrel təmsil etdiyi şirkətlə Azərbaycan arasındakı əməkdaşlıqdan məmnunluq ifadə etmiş və ölkəmizi bp-nin ən yaxın tərəfdaşlarından biri adlandırmışdır.