Azərbaycanda qeydiyyatda olan hüquqi və fiziki şəxslər 2012- ci ilin yanvar-noyabr aylarında dünyanın 154 ölkəsindəki tərəfdaşları ilə ticarət əməliyyatları aparmışlar.

 Dövlət Statistika Komitəsinin yaydığı məlumatda deyilir ki, xarici ticarət dövriyyəsinin həcmi 39 milyard 473,1 milyon ABŞ dolları təşkil etmişdir, onun 8 milyard 444,7 milyon dolları idxalın, 31 milyard 28,4 milyon dolları isə ixracın payına düşür. Xarici ticarət dövriyyəsində  22 milyard 583,7 milyon dollar həcmində müsbət saldo yaranmışdır. 2011-ci ilin  müvafiq dövrü ilə müqayisədə xarici ticarət dövriyyəsinin həcmi 19,1%, o cümlədən ixrac üzrə 26% artmışdır. İdxal isə 0,7% azalmışdır. Müsbət saldo 2011-ci ilin yanvar-noyabr aylarına nisbətən 40% çox olmuşdur.

 Hesabat dövründə qeyri-neft məhsullarının ixracı 1 milyard 477,8 milyon dollar dəyərində olmuş və 2011-ci ilin yanvar-noyabr aylarının səviyyəsini 11,2% üstələmişdir.

 Məlumatda daha sonra bildirilir ki, xarici ticarət əməliyyatlarının 82,7%-i İtaliya, ABŞ, Rusiya, Türkiyə, İsrail, Fransa, İndoneziya, Hindistan, Almaniya, Yunanıstan, Çin, Tayvan (Çinin əyaləti), Böyük Britaniya, Gürcüstan, Çexiya, Bolqarıstan, Ukrayna və Malayziya, qalan 17,3%-i isə digər ölkələrlə aparılmışdır.

“Xalq qəzeti”