“SOCAR-Turkey Enerji A.Ş.” şirkətinin rəhbəri Kənan Yavuz jurnalistlərə müsahibəsində bildirmişdir ki, Trans-Anadolu təbii qaz boru kəmərinin (TANAP) marşrutundakı gözlənilməz dəyişikliklər səbəbindən bu layihənin həyata keçirilməsinə daha 3 milyard dollar vəsait ayrılacaqdır. Onun sözlərinə görə, TANAP-ın dəyərinin əvvəllər 7 milyard dollar olacağı bəyan edilmişdi. Bu dəyişikliklərdən sonra layihə 10 milyard dollara başa gələcəkdir.

  Türkiyədə elektrik enerjisinin 45 faizinin təbii qazla əldə edildiyini və tələbatın da ildən-ilə artdığını diqqətə çatdıran K.Yavuz demişdir ki, bu baxımdan TANAP layihəsi iqtisadiyyata yeni nəfəs verəcəkdir. BOTAŞ və TPAO şirkətləri bu boru xəttində 20 faizlik paya sahib olacaqlar və ildə minimum 6 milyard kubmetr təbii qaz alacaqlar.

  K.Yavuz onu da əlavə etmişdir ki, Azərbaycan sərmayəsi ilə inşa edilən “Star” neft emalı zavodunun tikintisi üzrə bu ay mühəndislik, tədarük və inşaat kontraktı da imzalanacaqdır. İnşaat işlərinə başlanandan 45 ay sonra zavod istifadəyə veriləcəkdir.  Burada emal olunacaq 10 milyon ton məhsulun 3 milyon tonu “Petkim” şirkətinə veriləcək, qalanı isə Türkiyə bazarında satılacaqdır.  

Oqtay BAYRAMOV,
AzərTAc-ın xüsusi müxbiri
Ankara