“Nabucco” şirkəti ilə “Şahdəniz” konsorsiumunun üzvləri arasında əməkdaşlıq barədə razılıq əldə olunmuşdur.

“Nabucco” Beynəlxalq Şirkətinin (NIC) yaydığı məlumata görə, “Nabucco” şirkəti, NIC-in səhmdarları (OMV, “BOTAŞ”, BEH, “Transgaz”, RWE, FGSZ) və potensial investorlar (ARDNŞ, bp, “Statoil” və “Total”) bəzi prinsiplər üzrə razılığa gəlmişlər.

“APA-Economics”in məlumatına görə, “Şahdəniz” qazının Avropaya ixracı marşrutu üzrə seçimə qədər “Nabucco West”in hazırlıq məsrəflərinin birgə maliyyələşdirilməsi, “Şahdəniz” konsorsiumunun “Nabucco West”in xeyrinə olan kəmər seçiminin ardınca potensial investorlara NIC-də səhmdar kimi iştirak etmək üçün 50%-lik pay təqdim edilməsi nəzərdə tutulur.

Məlumatda bildirilir ki, Pay Hissəsi və Maliyyələşmə Razılaşmasından əlavə, həmçinin, “Şahdəniz” konsorsiumu, NIC və “Nabucco” səhmdarları “Nabucco West”in sonrakı inkişafı və “Şahdəniz-2” istiqamətində Əməkdaşlıq Müqaviləsi üzrə də razılığa gəlinmişdir. “Hər üç müqavilə yekunlaşmaq üzrədir və qısa zamanda Vyanada müvafiq tərəflər arasında imzalanacaq”.

Qeyd olunur ki, “Şahdəniz” qazının Avropaya ixracı marşrutu üzrə boru seçimi ilə bağlı son qərarın 2013-cü il iyunun 30-da “Şahdəniz” konsorsiumu tərəfindən veriləcəyi gözlənilir.