Azərbaycanda qızıl yataqlarından qızılın yuyularaq çıxarılmasını xeyli sürətləndirən yeni texnoloji üsul kəşf olunmuşdur.

 APA-nın xəbərinə görə, bunu AMEA-nın vitse-prezidenti, Geologiya İnstitutunun direktoru, akademik Akif Əlizadə institutun bu gün keçirilən illik hesabat iclasında bildirmişdir. Onun sözlərinə görə, hazırda bu üsul texnoloji sirr şəklində qorunmaqdadır.

 A. Əlizadə demişdir ki, rəhbərlik etdiyi qurum tərəfindən “Azərbaycanın filiz yataqlarında təbiətə ziyan vurmadan metalların çıxarılma texnologiyasının tədqiqi, işlənilməsi və tətbiqi” Dövlət Proqramının bütün bəndləri üzrə aparılan elmi-tədqiqat işləri başa çatdırılmışdır: “Azərbaycanda ilk dəfə olaraq geotexnologiya elminin əsas prinsipləri 3 yataq üzərində sınaqdan keçirilmişdir. Seçilən yataqlar üzrə termodinamika əsasında yeraltı aşındırma modelləri qurulmuşdur. Yataqda qazılan quyularda böyük həcmli filiz kütləsi üzərində yeraltı aşındırma prosesinin aparılması yolları araşdırılmışdır. Elmi-tədqiqat işlərini davam etdirmək məqsədilə filiz yataqlarından birində poliqon və yarımsənaye pilot kompleksinin yaradılması üçün Nazirlər Kabinetinə xüsusi layihə hazırlanıb təqdim edilmişdir. Layihə Ekologiya və Təbii Sərvətlər, İqtisadi İnkişaf, Maliyyə, Sənaye və Energetika nazirlikləri tərəfindən dəstəklənmişdir”.