Qiymətli Kağızlar üzrə Dövlət Komitəsi tərəfindən Azərbaycan Respublikası Mərkəzi Bankı nəzdində Azərbaycan İpoteka Fondunun təmin edilmiş, faizli adlı sənədsiz istiqrazlarının emissiya prospekti qeydə alınmışdır.

Bakı Fond Birjasından (BFB) AzərTAc-a bildirilmişdir ki, emissiyanın həcmi 40 milyon manat, yerləşdiriləcək istiqrazların sayı 40 min ədəd, bir istiqrazın nominal dəyəri min manat, tədavül müddəti 10 ildir. İstiqraz üzrə gəlirlilik 3 faiz təşkil edir, ödəniş dövrünün müddəti isə 180 gündür. 

Emissiya prospektinə əsasən, yerləşdirmə kütləvi təklif üsulu ilə BFB vasitəsilə keçiriləcəkdir. Yerləşdirmədə iştirak edən təşkilat isə Azərbaycan respublikasının Mərkəzi Bankıdır.

İstiqrazları əldə etmək istəyən şəxslər BFB-nin üzvü olan və broker lisenziyasına malik olan təşkilata müraciət edə bilərlər.

Azərbaycan İpoteka Fondunun istiqrazlarının emissiya prospekti BFB-nin internet saytının (www.bfb.az) “Emitentlər” bölməsində yerləşdirilmişdir.